E në media po raportohet se në pompa të ndryshme të derivateve, çmimet po sillen nga 1.79 cent deri në 1 euro e 87 cent.
Kryetari i Shoqatës së Naftëtarëve, Fadil Berjani ka konfirmuar për Teve1.info se çmimi i naftës sot në tregun kosovar po sillet 1.75 cent, ndërsa benzina 1.77 cent.
Berjani thotë se çmimet janë të larta për gjendjen ekonomike të cilët e kanë qytetarët.
“Sa i përket rritjes të çmimeve se a do të ketë rritje dhe sa do të mbërrin çmimi s’mundemi me paragjykuar se ka lëvizje të mëdha në berzën ndërkombëtare. Çmimet janë të larta për gjendjen ekonomike të cilën e kanë qytetarët tanë. Po rritja e derivateve është duke ndodhur në tërë globin e jo vetëm te ne. Besoj që qytetarët tanë janë duke e kuptuar se rritjen e çmimeve e dikton berza dhe kjo po ndodh në tërë botën”, ka deklaruar Berjani.
Sipas tij, stabilizim të tregut do të kemi pasi të përfundon lufta në Ukrainë.
Pas rritjes së çmimeve të derivateve, ka reaguar edhe Shefi i Grupit Parlamentar të AAK-së, Besnik Tahiri.
Tahiri ka thënë se qytetarët po paguajnë një litër naftë pothuajse me çmim të njëjtë sikurse një qytetar i Bashkimit Evropian por me të ardhura shumëfish më të ulëta.
“Sot, qytetari i Kosovës paguan një litër naftë pothuajse me çmim të njëjtë sikurse një qytetar i Bashkimit Evropian por me të ardhura shumëfish më të ulëta. Rritja e çmimeve të produkteve elementare po e vështirëson tejmase jetën e qytetarit të Kosovës. Qeveria Kurti, a jeni në Kosovë, a krejt jeni dalë!!”, ka shkruar Tahiri. /teve1.info/
