Ministri në detyrë i Punëve të Brendshme, Xhelal Sveçla, ka njoftuar se është marrë vendim për ndalimin e plotë të ndezjes së zjarreve në të gjitha ambientet e hapura në territorin e Kosovës.
Ky vendim përfshin ndalimin e djegies së mbeturinave, pyjeve, fushave, livadheve, ndezjeve për piknik apo rekreacion, si dhe përdorimin e fishekzjarreve.
Masat e reja vijnë si përgjigje ndaj rritjes së temperaturave dhe rrezikut të shtuar për shpërthim zjarresh, të cilat mund të rrezikojnë jetën e qytetarëve, mjedisin dhe pronën publike e private.
“Ndezja e zjarreve është vepër penale dhe shkelësit e këtij vendimi do të përballen menjëherë e pa dilemë me masat ndëshkuese që parasheh legjislacioni ynë”, deklaroi ministri Sveçla.
Ai u bëri thirrje qytetarëve të tregojnë kujdes maksimal, të respektojnë vendimin dhe të shmangin çdo veprim që mund të shkaktojë zjarr ose përhapjen e tij. Në rast të ndonjë rreziku apo zjarri, qytetarët inkurajohen të lajmërojnë menjëherë zjarrfikësit në numrin 193 ose Policinë në 192.
