Rreth 40 mijë të rinj vlerësohet se janë me aftësi të kufizuar në Kosovë, mirëpo vetëm një përqindje e vogël e tyre ka qasje në arsim.
Por qasje në arsimin publik ka vetëm një pjesë e vogël e tyre.
Ndërsa sfidat që prindërit e këtyre fëmijëve përballen vazhdojnë të jenë të mëdha.
“Ajo çka ne kemi parë së fundmi në takimet tona është një numër i madh i fëmijëve me aftësi të kufizuar që kanë të drejtën dhe provojnë ta ushtrojnë të drejtën e tyre për arsim, mirëpo ajo me të cilën ata ballafaqohen janë kushtet në mungesë për të plotësuar gjithë-përfshirjen”, shprehet Mimoza Bytyçi-Rrahmani nga grupi avokues i prindërve të fëmijëve me aftësi të kufizuar
Andaj Bytyçi-Rrahmani ka një kërkesë për institucionet.
“Fëmijët të cilët në kushte shtëpiake mund të zhvillojnë edukimin e tyre, t’u ipet përkrahje gjithashtu edhe në kushte shtëpiake. Të gjejmë zgjidhje dhe të mos u mohohet e drejta e arsimit”, thotë ajo.
E arsyet e mospërfshirjes së fëmijëve me aftësi të kufizuar në sistemin arsimor i tregon Handikos.
“Vetëm 12% e fëmijëve me aftësi të kufizuar janë të përfshirë në sistemin arsimor, që i bie se 88% prej tyre janë jashtë bankave shkollore. Lypset shtimi i numrit të asistentëve, pastaj arsye tjera janë gjendja e tyre shëndetësore, mungesa e transportit shkollë-shtëpi-shkollë”, thotë Kaltërina Misini nga Handikos.
Kurse në Raportin e Progresit përveç gjithëpërfshirjes, kërkohen edhe përmirësime të tjera për këtë kategori.
“Për sa i përket përfshirjes, pavarësisht disa përmirësimeve, fëmijët nga grupet vulnerabël dhe pakicat vazhdojnë të jenë të margjinalizuara kur bëhet fjalë për mundësitë e arsimimit. Përpjekje shtesë duhet të bëhen gjithashtu për të përmirësuar aksesin në hapësirat publike dhe transportin për fëmijët me aftësi të kufizuara dhe me dëmtime fizike”, thuhet në raport.
Tëvë1 ka kërkuar nga Ministria e Arsimit të dijë se çka është në plan të ndërmerret më shumë për qasjen në arsim të fëmijëve me aftësi të kufizuar, mirëpo deri në publikim të kronikës, të njëjtët nuk kanë kthyer përgjigje.
