Kualifikimi në Ligën e Kampionëve dhe vendi i tretë i blinduar pas Milanit dhe Interit, por mbi të gjitha mbi Juventusin, i bën të buzëqeshin tifozët napolitan që vitin e ardhshëm duan të ëndërrojnë për titull, gjë që e ka në mend edhe mbrojtësi ynë që luan për këtë klub, Amir Rrahmani.
Në një intervistë për Radio Kiss Kiss Napoli, Rrahmani u shpreh i kënaqur me paraqitje e tij dhe të skuadrës që kthehen në garën më të madhe për klube vitin e ardhshëm.
“Ky është viti i parë që kam luajtur kaq shumë, si me Napolin ashtu edhe me përfaqësuesen. Shënova katër gola dhe ishte një vit shumë pozitiv për mua. Por në përgjithësi sezoni i ekipit ka qenë pozitiv, sepse ne kemi rifituar zonën e Ligës së Kampionëve”.
“Ka keqardhje që nuk e kam fituar Scudetton, por sezoni është pozitiv. Sigurisht që ka keqardhje sepse kemi mundur të jemi më lartë në renditje. Ne kemi vuajtur shkaku i disa lëndimeve gjatë muajve, por edhe disa ndeshje në të cilat mund të mblidhnim më shumë pikë”.
“Në pjesën e dytë të kampionatit duhet të kishim fituar disa sfida që na dolën jashtë kontrollit. Na vjen keq sepse do të kishte qenë një ëndërr për ne për ta fituar kampionatin”, ka thënë Rrahmani.
Rrahmani: Spalletti më bëri të rritem, vitin e ardhshëm e duam Scudetton
Mbrojtësi nga Kosova më pas foli për trajnerin Luciano Spalletti, për të cilën ka respekt të madh dhe i falënderohet për rritjen që ka pësuar si lojtar.
“Spalletti na dha një lojë precize dhe personalisht u rrita shumë me të sepse edhe ai më ndihmoi në vendosje. Ne jemi mbrojtja më e mirë në kampionat dhe ky është një rezultat i mirë. Ne do të luajmë ndeshjen e fundit të dielën dhe do të përpiqemi ta mbyllim kampionatin siç është më së miri”, nënvizoi Rrahmani
Në fund të intervistës, Rrahmani u ka premtuar tifozëve që do të përmirësohen dhe të luftojnë deri në fund për titull.
“Presim të përmirësohemi dhe të mund të luftojmë për titull deri në fund. Ne duam shumë të fitojmë. Ne duam që të fitojmë Scudetton, që e ëndërrojnë edhe tifozët. Ne e ndiejmë dashurinë e njerëzve të Napolit çdo ditë dhe duam tu japim një gëzim të madh”, ka thënë Rrahmani për Radio Kiss Kiss Napoli.
Mbrojtësi ynë ka zhvilluar 41 ndeshje në të gjitha garat deri më tani për Napolin këtë sezon, ku e ka gjetur rrjetën edhe në katër raste.
