Me fund dramatik është mbyllur ndeshja derbi e xhiros së 32-të e elitës së futbollit të Italisë ndërmjet Romës dhe Milanit. Roma dhe Milani barazuan me rezultatin 1:1 të shtunën mbrëma, dhe mbesin me gjasa të barabarta për të siguruar një vend që dërgon në “Champions” në edicionin tjetër.
Të dy golat e kësaj përballjeje u realizuan në minutat shtesë. Sulmuesi anglez, Tammy Abraham, pas një kundërsulmi të shpejtë shënoi për 1:0 për vendësit, në minutën e tretë të kohës shtesë. Vetëm katër minuta më vonë, Alexis Saelemaekers pasi bashkëveproi me Rafael Leaon, barazoi shifrat në 1:1.
Marash Kumbulla pas një dhimbje që e pati mbi gju, u zëvendësua në minutën e 15-të të ndeshjes.
Milani e Roma mbesin në pozitën e katërt dhe të pestë me nga 57 pikë. Kanë tri pikë më shumë se Interi që është në pozitën e gjashtë. Interi, me një ndeshje më pak të luajtur, të dielën në mesditë e pret skuadrën e Lazios.
