Prindërit do të kenë mundësinë të bllokojnë fëmijët e tyre nga lojëra dhe përvoja të caktuara në Roblox si pjesë e masave të reja të sigurisë të shpallura nga platforma e lojërave shumë të popullarizuar, njofton BBC.
Ata gjithashtu do të mund të bllokojnë ose raportojnë miqtë e fëmijëve të tyre, dhe platforma do të ofrojë më shumë informacion rreth lojërave që përdoruesit e rinj po luajnë.
Masat do të aplikohen vetëm për fëmijët që janë nën moshën 13 vjeçare dhe kanë aktivizuar kontrollin parental në llogaritë e tyre.
Njoftimi vjen pas deklaratës së CEO-së të Roblox, Dave Baszucki, i cili i tha BBC-së se prindërit duhet të mbajnë fëmijët e tyre larg platformës nëse “nuk ndjehen rehatshëm” me të. Roblox – platforma më e popullarizuar në Mbretërinë e Bashkuar për lojtarët nga 8 deri në 12 vjeç – ka qenë përballë akuzave se disa fëmijë po ekspozohen ndaj përmbajtjeve eksplicite ose dëmshme përmes lojërave të saj.
Megjithatë, në intervistën e tij për BBC-në, Baszucki theksoi se kompania është vigjilente për të mbrojtur përdoruesit e saj, me “dhjetëra miliona” njerëz që kanë përvoja “të mrekullueshme” në Roblox.
Duke shpallur funksionet më të fundit të sigurisë, Oficeri Kryesor i Sigurisë në Roblox, Matt Kaufman, tha: “Këto mjete, veçori dhe inovacione pasqyrojnë misionin tonë për ta bërë Roblox platformën më të sigurt dhe më civile online në botë.”
Një përfaqësues i rregullatorit, Ofcom, tha se masat ishin “inkurajuese”, por shtoi se “kompanitë teknologjike do të kenë për të bërë shumë më tepër në muajt në vijim për të mbrojtur fëmijët online”.
