Ministrja e Ekonomisë, Artane Rizvanolli, ka dhënë detaje lidhur me Ndërmarrjen “Korporata e Ruajtjes së Energjisë”, për të cilën u miratua themelimi i saj në mbledhjen e fundit të Qeverisë.
Përmes një postimi, Rizvanolli ka shkruar se kjo korporatë do të ketë në pronësi dhe do të menaxhojë 125MW të kapacitetit të baterive të Programit Kompakt mes Qeverisë së Kosovës dhe ShBA-së, nga Korporata e Sfidave të Mijëvjeçarit.
“Korporata e Ruajtes së Energjisë” (KRE) do të ketë në pronësi dhe do të menaxhojë 125MW të kapacitetit të baterive të Programit Kompakt mes Qeverisë së Republikës së Kosovës dhe Shteteve të Bashkuara të Amerikës përfaqësuar nga Korporata e Sfidave të Mijëvjeçarit (MCC). Përmes grantit më të madh në histori të vendit tonë po ndërtojmë kapacitetet e ruajtjes së energjisë ndër më të mëdhatë për kokë banori në Evropë, e që do të menaxhohen nga kompania më e madhe në rajon e kësaj natyre!” , ka shkruar Rizvanolli në Facebook.
Më tej, ministrja ka renditur shërbimet që do t’i ofrojë ndërmarrja.
Ndërmarrja KRE do të ofrojë shërbime si:
– Arbitrazhi i energjisë
– Balancimi i sistemit energjetik
– Operimi i sistemit të ruajtjes së energjisë
– Tregtimi i energjisë së ruajtur në rajon
– Modelimi përmes teknologjisë informative dhe simulimi i sistemit
