Ministrja e Ekonomisë, Artane Rizvanolli, ka deklaruar se 24 orë pas sulmit terrorist në kanalin e ujësjellësit të “Ibër Lepencit”, prurjet në KEK kanë arritur nivele optimale për furnizim me ujë për termocentralin “Kosova B”.
Ministrja shtoi se furnizimi me ujë për qytetarët e rajonit të Mitrovicës tashmë ka filluar.
“24 orë pas sulmit terrorist në kanalin e Ibër Lepencit, prurjet e ujit në KEK kanë arritur nivele optimale për furnizim me ujë të TC “Kosova B”. Me këtë rast, Ibër Lepenci ka rifilluar furnizimin e fabrikave të ujit në rajonet e Mitrovicës dhe Prishtinës. Furnizimi me ujë për qytetarët e rajonit të Mitrovicës tashmë ka filluar, ndërsa gjatë orëve në vijim pritet të përmirësohet furnizimi edhe në komunat e prekura të rajonit të Prishtinës, përfshirë Fushë Kosovën, Drenasin dhe Obiliqin”, shkroi Rizvanolli në Facebook.
