Pas një pushimi prej gati dy javësh, rikthehet Superliga e Kosovës në futboll me ndeshjet e xhiros së 14-të, që do të zhvillohen përgjatë tri ditëve.
Të enjten, në zyrat e Federatës së Futbollit të Kosovës (FFK), është bërë tërheqja e shortit për gjyqtarët, të cilët tashmë janë caktuar për duelet e kësaj xhiroje.
Të shtunën, do të luhen dy ndeshje: Feronikeli ’74 – Gjilani dhe Malisheva – Dukagjini.
Në duelin që do të luhet në Drenas, gjyqtar kryesor do të jetë Vigan Ibërdemaj që do të asistohet nga Fatlum Berisha e Enis Bejtullahu, ndërsa i katërti do të jetë Granit Pacolli.
Valon Bajgora është gjyqtar kryesor në përballjen në Malishevë, me asistentët Granit Hyseni e Bajram Kabashi kurse i katërti do të jetë Rrezart Hasanaj.
Edhe të dielën, janë në program dy ndeshje kurse derbi do të luhet në stadiumin “Fadil Vokrri” në Prishtinë.
Prishtina – Ballkani, do të drejtohet nga kryesori Visar Kastrati që do të ndihmohet nga Fatmir Sekiraqa e Alban Ejupi kurse Isak Ceroviku do të jetë arbitër i katërt.
Mervan Bejtullahu kryesor, Drilon Rexhepi e Bekim Rama asistentë dhe Ersen Janovali gjyqtar i katërt, do të jetë katërshja e zyrtarëve të ndeshjes Suhareka – Ferizaj.
Ndërkohë, derbi tjetër i kësaj xhiroje që luhet të hënën në Gjilan ku do të përballen Drita dhe Llapi, i është besuar Genc Nuzës si gjyqtar kryesor.
Nuza do të asistohet nga Bujar Selimaj e Fatlum Berisha, ndërsa gjyqtar i katërt do të jetë Kujtim Krasniqi.
