Me humor të mirë u paraqit në rigjykim.
Ish ministri i Infrastrukturës, Pal Lekaj, po vazhdon përballjen për keqpërdorim të detyrës zyrtare bashkë me ish zyrtarët e tjerë, Nebih Shatri, Eset Berisha dhe Besim Tahiri.
Për marrëveshjen e nënshkruar me “BechtelEnka” për zgjatjen e afatit të përfundimit të punimeve të autostradës “Arbën Xhaferi” me kosto shtesë 53 milionë euro, dëshmoi paraardhësi i Lekajt, Lutfi Zharku.
Ai potencoi se në komitetin ndërministror të kryesuar nga vet ai, kishte ardhur kërkesa nga BechtelEnka për zgjatje të afatit, por e cila nuk ishte analizuar fare.
“Na nuk kemi hy në analiza të saj hiç, për shkak se kanë qenë në kundërshtim me kontratën dhe s’kanë mujt me dokumentu koston e tij, tha Zharku.
Përpos këtyre kërkesave, Zharku tha se në kohën sa ai ishte ministër, nuk ka pasur asnjë kërkesë për vonesa në ndarjet buxhetore.
“Kurrë, domethënë kurrë, asnjëherë nuk ka pasë neglizhenca. Edhe ashtu siç e kam cekë, “BechtelEnka” ka punu aq sa ka pasë buxhet të ndarë”,tha ish-ministri Zharku.
Përgjatë dhënies së dëshmisë së tij, ai dha edhe përshtypjen e tij se çfarë çoi në zgjatje të punimeve të autostradës Prishtinë – Hani i Elezit, pasi Zharku ishte larguar nga posti i ministrit.
“Ndarjet e pamjaftueshme buxhetore kanë shkaktuar zgjatje të afatit të përfundimit të punimeve”, tha ai.
Rasti i njohur si “53 milionëshi”, është duke u rigjykuar në Departamentin Special në Gjykatën Themelore në Prishtinë për herë të dytë, pasi Apeli e rrëzoi vendimin e
Themelores të vitit të kaluar, që Lekaj, Shatrit, Tahirin e Berishën, i kishte dënuar së bashku me mbi 10 vite burgim.
