Declan Rice debutoi zyrtarisht si titullar me Arsenalin në finalen e Superkupës së Anglisë. Arsenali iu fal penalltive për të thyer Manchester City dhe për ta nisur sezonin e ri me trofe.
Koha e rregullt përfundoi në barazim 1-1, por djemtë e Mikel Artetës u treguan më të saktë nga pika e bardhë.
Mesfushori anglez, për shërbimet e të cilit drejtuesit e klubit londinez paguan 116.6 mln euro në arkat e West Hamit, nuk e fshehu gëzimin e tij për këtë sukses.
“Jam i ekzaltuar, po dridhem nga emocionet, jam realisht shumë i lumtur. Kur përballesh me Manchester Cityn duhet të kesh durim, pasi kundër tyre zhvillon disa mini-ndeshje brenda ndeshjes.
Trajneri na kishte paralajmëruar për rreziqet që do të na vinin prej tyre. Jam përmirësuar shumë në tri javët e fundit, e ndjej. Po mësoj gjëra të reja, po rritem falë kërkesave të trajnerit.
Arsenali? Jam i sigurt se mund të realizojmë çdo objektiv këtë sezon. Mjafton që të qëndrojmë të fokusuar dhe të mos humbim përqendrimin”, deklaroi mesfushori me tipare mbrojtëse.
