Para gjashtë vitesh Shyhrete Tahiri Sylejmani theu heshtjen 20 vjeçare duke denoncuar publikisht dhunën seksuale nga forcat serbe gjatë luftës së fundit në Kosovë.
Guximin e nënës për të ndarë me botën një përjetim tronditës e rrëfeu e bija e Shyhrete Sylejmanit, Venesa.
Ajo ndau me pjesëmarrësit dhimbjen e trashëguar dhe pasojat e traumës ndër breza, duke theksuar se lufta nuk përfundon me heshtjen e armëve, por lë pasoja të thella te brezat që vijnë më pas.
“Në moshën 4-vjeçare unë isha dëshmitare e një krimi të luftës. Për 15 vjet të gjata, shëndeti im mendor dhe fizik ishte i rrezikuar rëndë. Deri dy vjet më parë, kur vendosa që nuk do ta lejoja më të më shkatërronte mua, ne, apo këdo tjetër. Megjithëse unë ende po e gjej timin, do ta përdor me krenari për ata që nuk kanë zë: si aktiviste për traumën ndër breza, çështjet e shëndetit mendor dhe për t’i dhënë fund stigmës për fëmijët anembanë botës. Trauma ndërbreznore nuk më përcakton dhe nuk do të më kufizojë kurrë”, ka thënë Sylejmani.
Një dëshmi nga lufta e ndau edhe Hada Hoxhiq. Por ajo foli për luftën në Bosnjë dhe Herceogovinë, dhimbjet e nënave të Srebrenicës.
“Edhe nëse kam mbetur pa të birin, pa vëlla, pa familje, pa qytetin tim, pa tokën time – unë e kam nderin, dhe i kam hapur sytë për dinjitetin njerëzor, për drejtësi dhe për paqe, për të drejtën e çdo njeriu, për shtetin tim që të mbështetet në paqe, jetë, liri, në të drejtën për të shprehur fenë apo bindjet, që na është mohuar në vendlindjen tonë”, ka thënë Hoxhiq.
Hada Hoxhiq, dhe nënat e Srebrenicës morën medalje presidenciale nga Presidentja Osmani në ditën e parë të Forumit Ndërkombëtar për Gratë, Paqen dhe Sigurinë.
Me këtë rast, Osmani tha që Srebrenica është një plagë e hapur në ndërgjegjen e botës.
