Kryetarja e Partisë së Re Demokratike (NDS), Emilia Rexhepi ka shprehur shqetësim lidhur me parregullsitë e dyshuara gjatë procesit zgjedhor në disa fshatra të Kosovës me shumicë boshnjake, duke kërkuar hetim urgjent nga institucionet përgjegjëse.
Përmes një postimi në Facebook, Rexhepi ka deklaruar se prej vitesh kanë paralajmëruar për mospërputhje mes numrit të votave dhe numrit të banorëve në fshatrat Jabllanicë, Pousko, Reçan dhe Lokvicë.
Sipas saj, falë komisionerëve dhe vëzhguesve të NDS-së, gjatë ditës janë identifikuar parregullsi të mundshme, të cilat janë raportuar te autoritetet kompetente.
Ajo ka shprehur shqetësim të veçantë për një incident në një vendvotim në fshatin Jabllanicë, ku janë gjetur fletëvotime të dëmtuara.
Rexhepi u ka bërë thirrje Policisë së Kosovës, Prokurorisë, Komisionit Qendror të Zgjedhjeve dhe Komisionit Komunal Zgjedhor që ta hetojnë rastin në mënyrë të plotë dhe t’i ndëshkojnë përgjegjësit nëse konfirmohen parregullsi.
“U bëj thirrje të gjithë komisionerëve, vëzhguesve dhe qytetarëve që të raportojnë çdo parregullsi, çdo presion ndaj votuesve dhe çdo përpjekje për vjedhjen e votave”, ka shkruar ajo.
Sipas saj, Partia e Re Demokratike do të vazhdojë të angazhohet me mjete demokratike dhe ligjore për mbrojtjen e çdo vote dhe integritetit të procesit zgjedhor.
“Vullneti i popullit nuk është në shitje dhe nuk duhet të manipulohet”, ka përfunduar ajo./teve1.info./
