Për shumë familje kosovare, ndihma nga diaspora është e domosdoshme.
Prandaj, remitencat mbeten burim i rëndësishëm i mbështetjes financiare për ekonomitë familjare dhe për ekonominë në përgjithësi.
Këtë e tregojnë statistikat e Bankës Qendrore të Kosovës.
“Remitencat kane shënuar një rritje të periudhës prej 3.4% duke arritur vlerën prej 651.7 milionë euro. Projeksionet e BQK sugjerojnë se edhe vitet në vijim do të ketë rritje të remitencave me një mesatare të ngjashme të rritjes sikurse në vitet paraprake.Për periudhën janar-qershor të këtij viti, shuma e dërgesave e shënuar është 651.7 milionë euro (të dhënat e muajit qershor janë preliminare). Krahasuar me periudhën e njëjtë te vitit të kaluar është shënuar një rritje për 21.6 milionë euro”.
Sipas ekonomistit Safet Gerxhaliu, remitencat duhet të përdoren për zhvillim dhe jo vetëm për konsum.
“Është për t’u brengosur fakti që remitancat shkojnë vetëm për konsum. Konsum i cili është i varur nga importi. Besoj që është koha kur duhet institucionet të mendojnë që të gjendet një metodë apo një formë që remitancat të jenë në funksion të zhvillimit: duke krijuar vende të reja të punës, duke sjellë teknologji moderne, duke ngritur nivelin e edukimit dhe përgatitjet profesionale. Por mbi të gjitha në përmirësimin e bilancit të pagesave, sepse në qoftë se vazhdojmë në këtë mënyrë, Kosova do të jetë një shtet që eksporton para të gatshme, por jo shërbime”, deklaroi Gerxhaliu.
Ai gjithashtu thekson se pa një strategji zhvillimore, Kosova nuk mund të shfrytëzojë potencialin e madh të diasporës për investime.
“Kosovës i mungon një strategji zhvillimore. Në qoftë se si shtet nuk ke strategji zhvillimore, atëherë nuk ke as një strategji se si të tërhiqet diaspora për të investuar në Kosovë. Në këtë drejtim, besoj që duhet të kemi një pako të veçantë që do të jetë stimuluese. Këtë e bëjnë vendet e rajonit. Prandaj, nuk duhet të shikohet kapitali i diasporës si një mjet për konsum, por si një mundësi për t’u zhvilluar, sepse me të vërtetë potenciali i diasporës kosovare është shumë më i madh sesa mendohet nga ana e politikës”.
Edhe sipas BQK-së, pjesa më e madhe e remitencave përdoren për konsum, duke mbuluar shpenzimet bazike të familjeve, ndërsa pjesa tjetër investohet kryesisht në patundshmëri.
Kronikë e realizuar nga Adea Mustafaj.
