Crystal Palace ka refuzuar ofertën e parë formale të Juventusit për sulmuesin Jean-Philippe Mateta, ka njoftuar të dielën “Sky Sport Italia”.
Mësohet se ekipi nga Premier League nuk është i kënaqur me ofertën e Juventusit për sulmuesin francez, i cili në parim ka marrëveshje personale me skuadrën italiane.
Crystal Palace ka kthyer prapa ofertën e Juventusit, e cila ishte huazim me opsionin e blerjes në fund të sezonit.
Për huazimin e Matetas, Juventusi kishte ofruar 2 milionë euro kurse blerjen në fund të sezonit do ta bënte obligative për 28 milionë euro nëse italianët do të kualifikoheshin të paktën në Ligën e Evropës.
Bazuar në këtë, Juventusi ka ofruar 30 milionë euro për Matetan por Crystal Palace po kërkon të paktën 40 milionë euro duke pasur parasysh se sulmuesi francez ka edhe 18 muaj kontratë valide.
Trajneri i Juventusit, Luciano Spalletti po kërkon me ngulm një sulmues dhe po insiston në Matetan.
