Kryetarja e Gjykatës Speciale, Ekaterina Trendafilova, ka refuzuar kërkesën e ish-presidentit, Hashim Thaçi, për zëvendësimin e gjyqtarit Nicolas Guillou.
Në njoftimin e lëshuar nga Dhomat e Specializuara, thuhet se një gjyqtar mund të zëvendësohet vetëm nëse nuk është në gjendje të kryejë detyrat e tij për shkak të angazhimit me një aktivitet, apo ka ndonjë profesion tjetër.
”Presidentja sqaroi se ajo mund të zëvendësojë një gjyqtar vetëm nëse gjyqtari nuk është në gjendje të kryejë detyrat e tij për shkak të angazhimit në një aktivitet apo profesion tjetër. Ky nuk është rasti me gjyqtarin Guillou, tha ajo, pasi ai do të ushtrojë funksionet e tij gjyqësore në GJNP vetëm nga 19 gushti. Deri në atë kohë, ai mbetet në dispozicion për të kryer detyrat e tij në Gjykatën Speciale”, thuhet në njoftim.
Po ashtu, thuhet se Trendafilova ka hedhur poshtë në mënyrë të përmbledhur kërkesën alternative të Mbrojtjes për përjashtimin e gjyqtarit Guillou, raporton teve1.info.
‘’Mbrojtja nuk dha asnjë argument se si pozicioni gjyqësor i gjyqtarit Guillou në një gjykatë tjetër, e cila nuk ka juridiksion të mbivendosur me Gjykatën Speciale, mund të ndikojë në pavarësinë e tij’’, thuhet tutje./teve1.info/.