Kandidati i Partisë Demokratike të Kosovës për kryetar të Mitrovicës, Arian Tahiri, ka reaguar pas vendimit të Panelit Zgjedhor për Ankesa dhe Parashtresa (PZAP), i cili ka refuzuar ankesën e PDK-së për parregullsitë e pretenduara në procesin zgjedhor në Mitrovicë.
Tahiri tha se PDK shpreh “zhgënjim të thellë” me vendimin, të cilin e konsideron të padrejtë dhe të pambështetur në atë që, sipas partisë, ka ndodhur gjatë procesit të numërimit dhe administrimit të votave.
Ai theksoi se PDK ka paraqitur “fakte, dëshmi dhe situata të dokumentuara” që pretendojnë cenimin e procesit zgjedhor dhe të vullnetit të qytetarëve.
Sipas Tahirit, partia do të përdorë të gjitha instrumentet ligjore që parasheh Republika e Kosovës, duke njoftuar se hapi i radhës është paraqitja e ankesës në Gjykatën Supreme.
“PDK është dhe mbetet në mbrojtje të votës së lirë, të drejtë dhe të pastër të qytetarëve”, tha Tahiri, duke shtuar se kërkesa e partisë është vetëm respektimi i ligjit dhe i vullnetit të shprehur nga qytetarët e Mitrovicës.
Ai përfundoi deklaratën me mesazhin se partia “do të vazhdojë deri në fund” për të kërkuar drejtësi në këtë proces. /teve1.info/
