Deputeti i Partisë Demokratike të Kosovës, Artan Behrami, ka reaguar pas vendimit të Panelit Zgjedhor për Ankesa dhe Parashtresa (PZAP), i cili ka refuzuar ankesën e PDK-së lidhur me, siç pretendon partia, parregullsitë në procesin zgjedhor në Mitrovicën e Jugut.
Sipas PDK-së, vendimi i PZAP-it është i padrejtë dhe nuk reflekton realitetin e situatës në terren.
Behrami tha se partia ka paraqitur “fakte, dëshmi dhe situata të dokumentuara” që sipas tyre tregojnë se procesi zgjedhor është cenuar dhe se vullneti i qytetarëve nuk është respektuar.
Ai njoftoi se hapi i radhës do të jetë paraqitja e ankesës në Gjykatën Supreme të Kosovës.
“Ne nuk do të ndalemi. Do t’i shfrytëzojmë të gjitha mekanizmat ligjorë që garanton Republika e Kosovës. Gjykata Supreme është instanca përfundimtare për të garantuar drejtësi dhe integritet të procesit zgjedhor”, deklaroi Behrami.
PDK thotë se do të vazhdojë të mbrojë “votën e lirë dhe të pastër të qytetarëve të Mitrovicës”, duke kërkuar vetëm respektimin e ligjit dhe të vullnetit të qytetarëve.
“Drejtësia do të vijë. Ne do të vazhdojmë deri në fund”, përfundoi deputeti i PDK-së.
