“Rritja e çmimeve ndërkombëtare të energjisë ka sjellë ndërprerje të energjisë elektrike në Europë, derisa Kosova tha se nuk mund të përballojë më të importojë energji elektrike, duke shtuar frikën se tensionet me Rusinë do ta zhysin kontinentin në krizë këtë dimër”, thuhet në artikull, shkruan ekonomiaonline.
Ky medium shkruan edhe për kapacitetin e prodhimit vendas të Kosovës, duke shtuar se i gjithi vjen nga termocentralet me qymyr “shumë ndotës” e cili mjafton vetëm për të plotësuar rreth dy të tretat e kërkesës. Si kontekst, ky medium shkruan se kriza e energjisë vjen në sfondin e rritjes së tensionit me Serbinë pas vendimit të Qeverisë së Kosovës për targa dhe dokumente.
Po ashtu, edhe Reuters shkruan për krizën, por duke raportuar edhe për anulimin e përkohshëm të vendimit për reduktime pasi kishte arritur të siguronte energji elektrike nga Shqipëria fqinje, megjithëse nuk tha se sa do të zgjaste marrëveshja.“Nëse tani kemi ndërprerje, çfarë do të ndodhë në dimër? A do të ngrijmë?” tha prishtinasi Milaim Berisha për Reuters.
Të hënën, rrjeti i shpërndarjes së energjisë në Kosovë, KEDS, njoftoi se do të letë reduktime të energjisë elektrike, gjashtë orë me rrymë dhe dy orë pa të, për shkak të krizës me energjinë në Kosovë.
Vendimi u anulua pas disa orëve. Mirëpo rreth këtij vendimi pati reagime nga përfaqësues të partive opozitare, qytetarë e organizata të ndryshme ekonomike e biznesore.
