Spektaklin e madh të futbollit apo ndeshjen “El Clasico”, e ka fituar skuadra e Real Madridit, që mposhti Barcelonën në shtëpi.
Në ndeshjen e luajtur të dielën në stadiumin “Santiago Bernabeu” të Madridit, Reali triumfoi me rezultatin e ngushtë 2:1.
Në fakt, Reali ka mundur të shënojë fitore edhe më të thellë por sulmuesi Kylian Mbappe dështoi nga penalltia.
Me këtë trium, Real Madridi forcohet në krye të tabelës së La Ligas me 27 pikë, pesë më shumë se Barcelona që renditet e dyta pas 10 xhirove të luajtura këtë sezon.
Përderisa për Realin, kjo ishte fitorja e nëntë këtë sezon në kampionat, Barcelona regjistroi disfatën e dytë.
Real Madridi e nisi mirë ndeshjen dhe qysh në minutën e 22-të, zhbllokoi rezultatin me anë të sulmuesit Kylian Mbappe.
Mbappe mori top nga Jude Bellingham dhe shënoi përball portierit të Barcelonës, ekip që u rikthye në lojë pak pa përfunduar pjesa e parë.
Francezit iu anulua një gol dhjetë minuta më herët nga VAR-i, por Mbappe arriti të realizojë më vonë.
Fermin Lopez barazoi shifrat në minutën e 38-të dhe kur të gjithë prisnin që pjesa e parë të përfundonte me këtë rezultat, në skenë doli Bellingham.
Bellingham realizoi nga afërsia pas asistimit të Eder Militaos në minutën e 43-të dhe Reali shkoi në pushim me epërsinë e një goli.
Edhe pjesën e dytë, Real Madridi e nisi furishëm dhe pas vetëm shtatë minutave lojë, u dha penallti në favor të madrilenëve.
Mirëpo, nga pika e bardhë, Mbappe dështoi pasi goditjen e tij priti polaku Wojciech Szczesny, i cili në përgjithësi pati paraqitje të mirë dhe bëri shumë pritje.
Një skenë e pabesueshme ishte kur trajneri Xabi Alonso mori vendim për të zëvendësuar Viniciusin në minutën e 72-të në vend të Rodrygos.
Mirëpo, Vinicius nuk e priti këtë mirë duke u larguar drejt në dhomat e zhveshjes pas zëvendësimit, ku edhe shprehu pakënaqësi të madhe ndaj këtij vendimi.
Gjithashtu, në minutën e nëntë të kohës shtesë, Pedri i Barcelonës, u përjashtua nga loja pas dy kartonëve të verdhë shkaku i ndërhyrjeve.
Kjo edhe solli tensione mes bankinave të ekipeve por gjyqtari qetësoi situatën.
