Real Madridi takohet me Barcelonën në finalen e Superkupës së Spanjës, të dielën mbrëma.
Edhe pse jo në La Liga, “El Clasico” mbetet spektakël më vete.
Barcelona po e shikon mundësinë e triumfit për të marrë avantazh psikik për pjesën e dytë të kampionatit.
Real Madridi për të arritur në finale e eliminoi Valencian dhe tani synon që ta mbajë trofeun e fituar vitin e kaluar.
Barcelona këtë trofe për herë të fundit e kishte fituar në vitin 2018.
Në gjysmëfinale Barça e eliminoi Real Betisin.
Ky derbi luhet të dielën nga ora 20:00, në stadiumin “King Fahd International”, në Riad të Arabisë Saudite.
Eder Militao është në dyshim për të luajtur te Reali pasi u zëvendësua në triumfin ndaj Valencias. Ndërsa do të mungojë Lucas Vazquez. Eduardo Camavinga është një tjetër futbollist i madrilenëve që po kërkon rikthimin.
Aurelien Tchouameni dhe David Alaba nuk kanë udhëtuar fare në këtë turne për shkak të lëndimeve.
Te Barcelona, situata është më e mirë sa u përket lëndimeve dhe mungesave.
Robert Lewandowski dhe Jordi Alba do të luajnë për shkak se në Superkupë nuk vlen suspendimi.
Në ndeshjet e ndërsjella, Real Madridi ka 102 fitore, krahas 97 të Barcelonës, ndërsa 51 takime janë mbyllur baras.
