Lista Serbe ka reaguar pas arrestimit të serbit, Sreçko Sofronijeviq në pikë-kalimin kufitar në Bërnjak, pasi që i njëjti dyshohet për “prishje të rendit kushtetues të Kosovës”.
Përmes një postimi në rrjetin social, Facebook, Lista Serbe e ka konsideruar si ‘terror’ arrestimin.
“Arrestimi i sotëm i bashkëqytetarit tonë Srecko Sofronijeviq është vazhdim i terrorit të regjimit në Prishtinë mbi popullin tonë”, shkruhet në postimin e tyre.
Arrestimi i serbit, Sreçko Sofronijeviq është bërë në Bërnjak, dhe të njëjtit i është caktuar masë ndalimi prej 48 orësh.
Kështu ka bërë të ditur për Tëvë1, zëvendësdrejtori i Policisë së Kosovës për rajonin e veriu, Veton Elshani.
Elshani bëri të ditur se bëhet fjalë për një serb, i cili u plagos me armë në vjeshtën e vitit 2021 gjatë aksionit të njësive speciale të Kosovës në veri.
“Policia e Kosovës ka arrestuar një person në veri të Mitrovicës me inicialet S.S, i cili dyshohet për pjesëmarrje në protesta dhe prishje të rendit kushtetues”, tha ai./teve1.info/
