Nënkryetari i pestë nuk u zgjodh, por Kuvendi u tha se u konstituua.
Madje u thirr edhe mbledhja e kryesisë së Kuvendit për të hënën.
Por, ky konstatim i kryekuvendarit, nuk i bindi partitë opozitare.
Ndërsa Hykmete Bajrami nga LDK, tha se nënkryetari nga LDK, nuk do të marrë pjesë në mbledhjen e kryesisë të hënën.
“Ishit dëshmitarë të një shkelje flagrante të Kushtetutës, ku kryetari i sapo zgjedhur i Kuvendit të Kosovës mbylli seancën konstituive pa të drejtë sepse rregullorja e thotë qartë që Kuvendi konstituohet dhe seanca konstituive mbyllet vetëm në rastin kur zgjedhet kryetari dhe zgjidhen të gjithë nënkryetarët”, deklaroi Bajrami.
Por, punë të kryer konstituimin e Kuvendit të Kosovës, po e llogarisin në Lëvizjen Vetëvendosje.
Madje, sipas deputetit të LVV-së, Hekuran Murati, kanë filluar edhe afatet kushtetuese për formimin e qeverisë.
Ndërsa nënkryetarja e Kuvendit të Kosovës, Albulena Haxhiu, akuzoi opozitën për abstenimet e tyre ndaj Nenad Rashiqit.
E akuzat e Haxhiut, kthyen edhe një herë në foltore deputeten e LDK-së, Hykmete Bajramin.
“Është hipokrizi me dal para mediave dy eksponent të Lëvizjes Vetëvendosje dhe me apostrofuaar parti tjera se kinse ne jemi me Listën Serbe, ndërkohë që janë përgjimet e Mimoza Kusarit duke qenë shefe e 58 deputetëve me Listën Serbe dhe Milan Radojqiçin. Ata që neve na quajnë bashkëpunëtorë të tyre ju keni dëshmi se kanë bashkëpunuar për vota për të zgjedhur persona në Gjykatë Kushtetuese dhe gjithashtu për ligjin për pagën e veteranëve të luftës me Milan Radoiqiq”, u shpreh Bajrami.
Nga 15 prilli e deri më sot, deputetët e Kuvendit të Kosovës kanë tentuar plot 61 herë për ta konsistuar organin ligjvënës.
