Federata e Taekwondos e Kosovës (FTK), të martën ka reaguar për incidentin që ndodhi të dielën paradite në Tiranë.
Trajneri kosovar, Valmir Fetiu ka qëlluar me shuplakë garuesen dhe vajzën e tij 8-vjeçare.
FTK-ja, ka refuzuar të deklarohet të dielën e të hënën, ndërsa lëshoi një komunikatë për rastin të martën pasdite.
Federata kosovare ka njoftuar për dënimin gjashtëmujor të trajnerit nga Federata Evropiane e Taekwondos, gjë që u bë e ditur të hënën nga federata evropiane.
“Duke punuar dhe shpresuar që raste si ky dhe raste tjera të ngjashme të mos përsëriten më, FTWK dënon ashpër veprime të tilla dhe zotohet se gjithmonë do të marrë masa ndaj këtyre dukurive”, ka shkruar federata kosovare e taekwondos.
Ngjashëm si FTK-ja, është deklaruar menjëherë edhe Komiteti Olimpik i Kosovës (KOK), që po ashtu nuk ishte prononcuar të hënën.
“KOK-u duke vlerësuar rastin si të ndjeshëm, fillimisht ka zhvilluar takime me drejtuesit e federatës, në mënyrë që të marrë të gjitha informatat e nevojshme në lidhje me incidentin. KOK-u përkrahë FTK-në në lidhje me vendimin për suspendim të trajnerit dhe njëherit dënon incidentin e ndodhur, me shpresën dhe besimin se raste të tilla, të cilat njollosin sportin e Kosovës, të jenë të fundit”, shkruan në një postim të Komitetit Olimpik të Kosovës.
