Në Klinikën Infektive në QKUK, është spitalizuar pacienti i parë me Lijën e Majmunëve. Gjendja e tij vlerësohet të jetë stabile, ndërkohë që si rezultat i kontaktit me të, edhe një punonjës shëndetësor është izoluar.
Lija e majmunëve ka arritur në Kosovë.
Të premten është konfirmuar rasti i parë me virusin e njohur si M-Pox.
Pacienti është nën kujdesin e mjekëve në QKUK, e i cili dyshohet se këtë virus e ka marrë gjatë qëndrimit të tij katër mujor në Afrikën Perëndimore, e cila llogaritet si zonë me rrezik të lartë për M-Pox.
“Rasti i gjinisë mashkullore (30 vjeç), shtetas i Republikës së Kosovës, është spitalizuar në Klinikën Infektive/QKUK me datë 24.12.2024, pas kthimit nga një shtet i Afrikës Perëndimore, me simptoma si temperaturë, ethe, ndryshimet në lëkurë, në fytyrë, në duar dhe kruarje. Pacienti është në gjendje stabile shëndetësore”.
Për kontaktet me këtë pacient, Shërbimi Spitalor ka njoftuar se është izoluar edhe një punonjës shëndetësor.
“Gjendja e përgjithshme e pacientit është stabile, dhe ai po trajtohet në përputhje me protokollet ndërkombëtare, jashtë rrezikut për jetë. Masat që janë ndërmarrë për parandalimin e përhapjes së infeksionit. Pacienti po trajtohet në kushte të veçanta për të parandaluar përhapjen e infeksionit. Një punonjës shëndetësor që ka pasur kontakt të drejtpërdrejtë me pacientin është izoluar dhe po diagnostikohet”, kanë deklaruar nga SHSKUK.
E rëndësishme vlerësohet të jetë edhe trajtimi i këtyre personave që kanë pasur kontakt me të infektuarin.
Për të parandaluar përhapjen e këtij virusi, kërkohet që në Kosovë të fillojë vaksinimi.
“E mira më e madhe kishte me qenë në qoftë se vendi ynë kishte pasur mundësi me e siguru një vaksinë përkatëse kundër sëmundjes së Lijes së Majmunit, dhe të bëhet vaksinimi tek ata qytetarë, tek ata persona mendoj të cilët janë të ekspozuar.”
IKSHPK-ja, ka vlerësuar se përkundër konfirmimit të këtij rasti, nuk ka vend për panik.
Edhe Ministri i Shëndetësisë, Arben Vitia ka thënë se Kosova i ka marrë të gjitha masat pas rastit të parë të konfirmuar me linë e majmunëve.
