Manaj, në një konferencë për media tha se nëse ministrja Haxhiu nuk jep dorëheqje sot, atëherë kryeministri, Albin Kurti, duhet ta shkarkojë atë
“Lidhja Demokratike e Kosovës vlerëson që zhdukja e mostrave të Astrit Dehari nga laboratori të IML-së që funksionon në kuadër të Ministrisë së Drejtësisë është super skandal dhe akti i shëmtuar kriminal. Ky rast tregon më së mirë gjendjen në të cilën është katandisur Ministria e Drejtësisë dhe institucionet vartëse të saj. Ministrja e Drejtësisë është e paaftë që të drejtojë këtë ministri dhe të udhëheq procesin e reformave në drejtësi. Prandaj, dorëheqja e ministres së Drejtësisë është minimumi i përgjegjësisë së saj në këtë rast dhe në shumë raste tjera parapake”, tha ai.
Tutje Manaj së nëse kryeministri Kurti nuk e shkarkon Haxhiun do e konsiderojnë si bashkëpërgjegjës për këtë rast siç e quajti ai super skandal dhe akt kriminal.
“Nuk mjafton pezullimi i zyrtarëve të IML-së, ky është një veprim me antë të të cilit mundohet të mbulohet përgjegjësia politike dhe institucionale e ministres së Drejtësisë. Prandaj, kërkojmë dorëheqjen e ministres së Drejtësisë, nëse nuk jep dorëheqje brenda ditës së sotme e ftojmë kryeministrin Kurti që ta shkarkojë atë – në rast se nuk e shkarkon e konsiderojmë bashkëpërgjegjës në këtë rast të zhdukjes së mostrave”, tha tutje Manaj.
Ndryshe ministrja e Drejtësisë, Albulena Haxhiu gjatë ditës së djeshme, ka thënë se janë zhdukur mostrat e Astrit Deharit laboratorin e toksikologjisë në Institutin e Mjekësisë Ligjore. Këtë ajo e ka cilësuar si akt të rëndë kriminal.
