Nga Graçanica erdhi në Prishtinë.
Ministri në detyrë për Komunitete dhe Kthim, njëherit kryetar i partisë Demokratike Progresive, Nenad Rashiq adresën e pati në Komisionin Qendror të Zgjedhjeve.
Kjo pasi siç tha ai, mbrëmë persona të panjohur telefonuan anëtarët e partisë së tij për të anuluar votën ndaj tij në këmbim parash në vlerë deri në 300.000 euro.
“Më kanë informuar që i kanë thirr disa numra të panjohur dhe me njerëz të panjohur kanë biseduar, ku ia kanë ofruar një shumë të madhe të parave vetëm t’i anulojnë votat që i kemi fituar në këtë proces, më shumë se 300.000 euro të cilat kanë qenë të ofruara për ata persona. Për mua është një alarm i jashtëzakonshëm sepse kjo shihet që është një organizim më i gjerë”, tha Rashiq.
Rashiq për Tëvë1 tha se president serb, Aleksandar Vuçiq dërgoi rreth 20 mijë votues nga Serbia në Kosovë, për ta votuar Listën Serbe.
“Kemi pasë dhjetëra njerëz të përjashtuar nga puna, kemi shantazhe me socialin, kemi pas dhunë fizike, kemi pas një agresion ndaj qytetarëve që ju nuk mund ta kuptoni çfarë po ndodh te komuniteti serb. Dhe në veçanti krejt ata njerëz që i kanë sjellë këtu, që i kanë pas letërnjoftimet e skaduar ata janë të mirëseardhur, por jo të vijnë pas 20 vitesh me letërnjoftim të skaduar dhe ta përcaktojnë fatin tonë dhe serbëve që jetojnë këtu”, tha ai.
Sipas tij, Lista serbe është parti mafioze.
“E dini edhe ju vet, si po kalojmë ne siç e kemi pasë një përfaqësim jo adekuat nga Lista Serbe dhe tash ne të cilët po përpiqemi që t’i prezentojmë interesat e serbëve autentik, vjen në kohë ku një organizatë mafioze i ofrojnë shuma parash njerëzve për anim të votave. Prandaj duhet të jemi vigjilent të gjithë, jo vetëm ne si parti politike, por edhe KQZ”, tha ai.
I pyetur nëse do të bëjë koalicion me Lëvizjen Vetëvendosje për ta formuar qeverinë, ai konfirmoi se është i hapur.
“Është normale që në jetën politike të jemi të hapur për çdo lloj të bisedës ose strategjia e përbashkët, prandaj po z.Kurti është adresa e parë por nuk përjashtoi mundësinë të flas me të gjitha partitë e tjera”.
Sipas të dhënave zyrtare të KQZ-së, Rashiq tashmë ka fituar një ulëse në Kuvendin e Kosovës, ndërkaq Lista Serbe 9 ulëse.
