Ministri në detyrë për Komunitete dhe Kthim, Nenad Rashiq, ka deklaruar se presionet ndaj tij politik dhe familjes së tij po vazhdojnë edhe pas zgjedhjeve të fundit parlamentare në Kosovë.
Sipas Rashiqit, së fundi është ndaluar për rreth dy orë në një pikë kufitare djali i tij, student, i cili, siç tha ai, është marrë në pyetje nga persona që janë prezantuar si pjesëtarë të Agjencisë për Siguri dhe Informacion të Serbisë (BIA).
“Thjesht ta dini, në këtë moment që po flasim, djali im, i cili është student, është ndaluar tashmë prej dy orësh në kufi dhe po pyetet nga disa njerëz që prezantohen si BIA… Kjo është vetëm një refleksion i vogël i asaj që po ndodh dhe që po u bëhet në mënyrë të organizuar të gjithë bashkëpunëtorëve tanë, madje edhe anëtarëve të familjes”, ka deklaruar Rashiq.
Ai ka theksuar se këto raste tregojnë, sipas tij, një rritje të presioneve pas procesit zgjedhor, të cilat i ka cilësuar si “më agresive dhe më brutale”.
Ngjarjet, sipas tij, vijnë në një periudhë të ndjeshme politike, pas deklarimeve të mëhershme për presione ndaj votuesve dhe përfaqësuesve politikë serbë në Kosovë. Në fund të majit, Rashiq kishte ngritur këto shqetësime edhe në mbledhje të Qeverisë së Kosovës, çka kishte nxitur reagime nga Lista Serbe.
Pas këtyre deklarimeve, në Graçanicë ishin arrestuar shtatë drejtues të institucioneve arsimore dhe shëndetësore serbe, nën dyshimet për “cenim të përcaktimit të lirë të votuesve”. Lista Serbe i ka cilësuar këto veprime si të motivuara politikisht dhe ka akuzuar Rashiqin për shënjestrim të komunitetit serb, akuza të cilat ai i ka mohuar.
Arrestimet kishin shkaktuar edhe protesta të përditshme në Graçanicë, ku qytetarët lokalë janë mbledhur në shenjë pakënaqësie.
Duke folur për zhvillimet politike pas zgjedhjeve dhe formimin e institucioneve të reja, Rashiq ka thënë se është ende herët për parashikime, por ka theksuar se do të angazhohet për dialog dhe kompromis në bisedimet me kryeministrin në mandat teknik.
