Ministri në detyrë i Financave, Hekuran Murati dhe deputetja e Lidhjes Demokratike të Kosovës, Hykmete Bajrami, janë përplasur publikisht lidhur me raportin më të fundit të Fondit Monetar Ndërkombëtar (FMN) për ekonominë e vendit.
Murati përmes një postimi në Facebook u shpreh se raporti i FMN-së “tregon se politikat e Qeverisë Kurti po japin rezultate dhe demanton ata që kishin parashikuar të kundërtën”.
Ai vlerësoi rritjen ekonomike si tregues të performancës pozitive të qeverisë.
Ndërkaq, Bajrami reagoi duke krahasuar situatën aktuale ekonomike me periudhën 2015-2017, kur sipas saj, gjendja ekonomike ishte më e qëndrueshme, pavarësisht situatave të tensionuara politike.
Ajo theksoi se gjatë atyre viteve rritja ekonomike ishte më e lartë se sot: 5.9% në 2015, 5.6% në 2016 dhe 4.8% në 2017, sipas të dhënave të Bankës Botërore.
“Norma e inflacionit sot është 4.7%, por kjo nuk përmendet nga Murati, i cili thekson vetëm rritjen 3.9%”, shkroi Bajrami, duke kritikuar qasjen e ministrit që sipas saj minimizon rreziqet ekonomike.
Raporti i FMN-së vlerëson se Kosova ka perspektiva pozitive ekonomike në rajon, duke parashikuar rritje të qëndrueshme të Prodhimit të Brendshëm Bruto (PBB) gjatë viteve 2025-2030: 3.9% në vitin 2025, 4.0% në 2026 dhe mesatarisht 3.5% deri në vitin 2030. Sipas FMN-së, vendi pritet të jetë lider në rritjen ekonomike në Ballkanin Perëndimor, duke ruajtur inflacionin më të ulët në krahasim me vendet e rajonit.
