Deputeti i Aleancës, Burim Ramadani, ka kërkuar përgjegjësi institucionale pas rastit të ngujimit të 63 minatorëve në minierën e Trepçës në Stantërg.
Minatorët kishin mbetur të bllokuar për disa orë në horizontin e 11-të të minierës, si pasojë e një defekti në furnizimin me energji elektrike. Ata më pas kanë arritur të dalin përmes rrugëve emergjente.
Përmes një postimi, Ramadani ka thënë se është i lumtur që minatorët kanë shpëtuar, por ka paralajmëruar se do të kërkojë përgjegjësi nga Qeveria.
“I lumtur që 63 minatorët shpëtuan. Do të kërkoj përgjegjësi nga Qeveria. Kjo nuk ishte hera e parë që minatorëve tanë – krenarisë së nëntokës së Kosovës – u ndodh të ngujohen në qindra metra thellësi”, ka shkruar Ramadani.
Ai ka kritikuar mënyrën e trajtimit të problemit me energjinë elektrike, duke kërkuar që rasti të mos konsiderohet thjesht si një problem teknik.
“Problemi me energji elektrike nuk duhet të trajtohet si problem teknik. Assesi. Përgjegjësi duhet të ketë!”, ka deklaruar Ramadani.
