Njohësi i rrethanave politike, Sadri Ramabaja vlerëson se marrëveshja e vitit 2013 e nënshkruar mes Kosovës e Serbisë, ka qenë e dëmshme. Këtë sipas tij e bëjnë të qartë disa nga informacionet e konferencës së sotme të presidentes Vjosa Osmani dhe sekretarit të NATO-s, Jens Stoltenberg.
Ai thotë se Kosova duhet të ketë komunikim të rregullt me partnerët strategjik, për t’i parandaluar skenarët më të dëmshëm të mundshëm.
“Sigurisht që për t’i parandaluar skenarët më të dëmshëm të mundshëm, ne kemi nevojë për një komunikim të rregullt, qoftë me selinë e NATO-s, qoftë me partnerët tanë strategjik. Dhe prandaj ka një peshë të rëndësishme kjo vizitë. Ndërkaq, disa prej informacioneve që rrodhën nga konferenca e shtypit, e bëjnë qartë se sa e dëmshme ka qenë marrëveshja e vitit 2013 që kishte nënshkruar atë botë ish-presidenti i Republikës, respektivisht kryeministri i Kosovës, që pamundëson operimin e Forcave të Sigurisë së Kosovës në të gjithë territorin e Republikës, si kusht, respektivisht, si kërkesë kryesore e Beogradit për nënshkrimin e marrëveshjes të vitit 2013”, deklaroi ai në “Info Nata” në Tëvë 1.
Duke komentuar deklaratën e Stoltenberg i cili ka thënë se presin nga Kosova konsultime për secilin veprim të Forcave të Sigurisë së Kosovës dhe Policisë së Kosovës, profesori Ramabaja potencoi se kjo nuk duhet të interpretohet që me marrëveshje të vitit 2013, përfshihet edhe kontrolli i veprimit të Policisë.
“Gjithsesi se koordinimi me faktorin e jashtëm, sidomos me trupat e KFOR-it atje është jashtëzakonisht i domosdoshëm, por interpretimi i marrëveshjes edhe ashtu të dëmshme të vitit 2013, që shtrin gamën edhe të kontrollit të veprimit dhe të Policisë, është jashtëkushtetues dhe nuk duhet të interpretohet kështu. Nuk besoj që edhe Stoltenberg ka gjykuar në këtë prizmë. Përkundrazi dihet, është fjala për Forcat e Sigurisë së Kosovës”, shtoi Ramabaja.
Në konferencën e përbashkët me presidenten Osmani, Stoltenberg tha sot se çdolloj zbarkimi i Forcave të Sigurisë së Kosovës dhe Policisë së Kosovës në veri të vendit, kërkon pëlqimin e KFOR-it.
“Në përputhje me përkushtimet e Prishtinës më 2013, çdo angazhim i Forcave të Sigurisë së Kosovës në veri kërkon negociim me KFOR-in. Ne presim konsultime për secilin veprim të Forcave të Sigurisë së Kosovës, Policisë së Kosovës, që mund të ketë ndikim në siguri”, është shprehur ai.
Teksa Osmani ka theksuar se marrëveshja e vitit 2013 e vë theksin vetëm te FSK-ja, dhe se Policia e Kosovës e ushtron detyrën prej më shumë se dy dekadash në të gjithë vendin pa dallim territori. /Teve1.info/
