Gjykata Komerciale e Kosovës ka vendosur që të ndalë punimet në “Rrugën A” (Jim Xhema), në kryeqytet, ku punimet e kësaj rruge kryetari i saj, Përparim Rama, i kishte cilësuar si projektin më strategjik.
Lidhur me pezullimin e projektit, kryetari Rama ka akuzuar se ky vendim është i bazuar në interesa politike e grupe interesi duke thënë se vendimi është marrë nga motra e deputetes së Vetëvendosjes, Fitore Pacolli, konkretisht nga gjyqtarja Vlora Pacolli.
“Vendimi i sotëm, i bazuar plotësisht në interesa politike dhe të grupeve të interesit, të cilat me çdo kusht po përpiqen ta bllokojnë transformimin e Prishtinës, është marrë nga, hiç më pak sesa motra e deputetes së VV-së Fitore Pacolli, gjyqtarja Vlora Pacolli”, ka shkruar Rama në Facebook.
Rama ka kërkuar nga Organi Shqyrtues i Prokurimit Publik që të ankohet ndaj këtij vendimi, që sipas tij cenon interesin publik.
“Kërkojmë nga Organi Shqyrtues i Prokurimit Publik si palë direkte në këtë procedurë që të ankohet ndaj këtij vendimi që cenon interesin publik. Ndërsa, nga Këshilli Gjyqësor i Kosovës, që në kuadër të kompetencave që ka, të sigurohet që ky proces të jetë i drejtë, profesional, i paanshëm, dhe i bazuar vetëm në ligj”./teve1.info/
