Kryetari i Prishtinës, Përparim Rama, ka reaguar ndaj, siç ka thënë ai, kërcënimeve të intensifikuara ndaj tij nga deputetë dhe asambleistë të Lëvizjes Vetëvendosje.
Rama ka ftuar publikisht organet e drejtësisë që të merren seriozisht me këto kërcënime, duke pyetur nëse drejtësia në Kosovë administrohet nga institucionet e pavarura apo nga zyrat e VV-së.
“Kërcënimet ndaj meje nuk janë asgjë e re. Ato vetëm sa janë intensifikuar kohëve të fundit nga deputetë dhe asambleistë të Lëvizjes Vetëvendosje, të cilët marrin guximin të kërcënojnë në emër të shtetit dhe institucioneve të tij”, ka shkruar Rama.
Ai ka thënë se askush nuk ka të drejtë të kërcënojë në emër të shtetit apo t’i përdorë institucionet si instrument presioni ndaj kundërshtarëve politikë, gazetarëve apo kujtdo që mendon ndryshe.
“Mandatin tim nuk ma ka dhënë asnjë militant dhe asnjë zyrë pushteti. Ma kanë dhënë qytetarët e Prishtinës. Dhe para tyre jap llogari për përgjegjësinë që kam marrë”, ka theksuar ai.
Rama ka shtuar se nuk do të zmbrapset përballë presioneve politike dhe se përgjegjësinë e tij do ta ushtrojë me vendosmëri.
“Mos e ngatërroni qetësinë me dobësi. As përmbajtjen me frikë. Ta keni të qartë, nuk më heshtni dhe nuk më ndalni”, ka shkruar Rama.
Ai ka përfunduar reagimin duke thënë se “Prishtina nuk qeveriset me kërcënime”, por me votën dhe besimin e qytetarëve të saj.
