Kryetari i Komunës së Prishtinës, Përparim Rama, ka bërë të ditur se Qendra për trajtimin e qenve endacakë të kryeqytetit, është afër finalizimit.
Andaj, Rama ka shtuar se me përfundimin e objektit, të gjithë qentë endacakë do të vaksinohen, shërohen, kastrohen dhe sterilizohen, raporton teve1.info.
“Qendra për trajtimin e qenve endacak është në fazën finale të ndërtimit. Objekti ka marrë formë dhe janë duke u përfunduar punimet e brendshme. Me përfundimin e këtij objekti, të gjithë qentë endacak të identifikuar në territorin e kryeqytetit do të trajtohen – vaksinohen, shërohen dhe kastrohen/sterilizohen në këtë qendër”, ka shkruar Rama në Facebook.
Njëherit, Rama ka njoftuar se shumë shpejt do të fillojnë edhe me ndërtimin e Parkut të Kafshëve, me fokus në qentë me dhe pa pronarë, në një sipërfaqe prej 10 hektarëve në fshatin Slivovë.
“Ndërtimi i Parkut tashmë është në fazën përgatitore të procedurave të brendshme të domosdoshme për realizimin e tij”, ka shtuar Rama./teve1.info/.
