Kryetari i Prishtinës, Përparim Rama ka thënë se nëse Qeveria e Kosovës zhbllokon fondet e Bankës për Rindërtim dhe Zhvillim (BERZH), për ndërtimin e Unazës së Kryeqytetit, atëherë nuk do të ketë tarifa për veturat që hyjnë në Prishtinë.
Rama ka thënë se vendosja e tarifave është ide në diskutim dhe nuk ka vendim.
Por, ai ka thënë se Prishtina ka nevojë urgjente për investime të mëdha infrastrukturore, veçanërisht për ndërtimin e Unazës së Kryeqytetit, sipas tij një projekt që do të zvogëlonte kolonat, do të lehtësonte qarkullimin, do të reduktonte ndotjen dhe do të përmirësonte cilësinë e jetës për të gjithë.
“Fatkeqësisht, ne jemi të detyruar të shqyrtojë alternativa financimi si rezultat i bllokimit të vazhdueshëm të fondeve nga qeveria aktuale. Dua të bëj një sqarim për një fakt shumë të rëndësishëm sa i përket fillesës së gjithë kësaj çështjeje. Paketa financiare për ndërtimin e Unazës së Qytetit arrinte vlerën prej rreth 206 milionë eurosh. Nga kjo shumë, deri në 40% ishin grant, pra para që nuk do të duhej të ktheheshin kurrë nga qytetarët. Ishin fonde falas, të siguruara për zhvillimin e Prishtinës dhe për realizimin e një prej projekteve më të rëndësishme infrastrukturore në historinë e qytetit”, ka shkruar Rama.
Sa i përket vendosjes së tarifave ai ka thënë se vendimi u takon qytetarëve të kryeqytetit.
Ai ka sqaruar se propozimi është që tarifa të jetë 1 ose 2 euro për automjetet që nuk janë të regjistruara në Komunën e Prishtinës, ndërsa deri në 10 euro për kamionët e mëdhenj që hyjnë në qendër të Prishtinës./teve1.info/
