Në 27-vjetorin e çlirimit të Prishtinës, përfaqësues të komunës ka bërë homazhe te Varrezat e Dëshmorëve në Velani, ku u nderua sakrifica e të rënëve për lirinë e Kosovës.
Kryetari i Prishtinës, Përparim Rama, së bashku me përfaqësues komunalë, veteranë dhe qytetarë, vendosën lule dhe bënë homazhe në nderim të dëshmorëve dhe heronjve të kombit.
“Jemi bërë bashkë këtu me komandant Remin edhe me ekipë nga kryeqyteti, drejtorë, me qytetarë, në nderim të dëshmorëve, të heronjve tanë të cilët e kanë dhënë jetën që sot ta gëzojmë lirinë, ta gëzojmë demokracinë, ta gëzojmë paqen. Edhe me kuptuar që, këto gjëra nuk na kanë pikë prej qiellit. Pra, janë si proces, i një situate të vështirë nëpër të cilën ka kaluar populli ynë. Dëshmorët tanë, heronjtë tanë e kanë dhënë jetën e për këtë arsye edhe vazhdojmë me i respektuar, sot e përgjithmonë.”, tha Rama.
Ai bëri të ditur se komuna është duke punuar në projektin monumental për rregullimin e hapësirës memoriale në Velani, që përfshin edhe zonat kushtuar ish-presidentit Ibrahim Rugova, dëshmorëve dhe heronjve të kombit.
Rama uroi qytetarët për Ditën e Çlirimit të Prishtinës, duke shprehur dëshirën që paqja të mbetet e përhershme.
