Po i bëjnë thirrjet e fundit për protestën mbarëkombëtare që pritet të mbahet të premten në Tiranë në përkrahje të ish-krerëve të Ushtrisë Çlirimtare të Kosovës që po gjykohen në Hagë.
Këshilli Koordinues i shoqatave të dala nga lufta, përfshirë SHBPK-në, Shoqatën e Familjeve të Dëshmorëve, Shoqatën e Invalidëve të Luftës së UÇK-së dhe Shoqërinë “Lëvizja”, presin që nesër të mbahet një protestë masive në kryeqytetin shqiptar.
Kryetari i Shoqatës së Familjeve të Dëshmorëve, Xhavit Jashari, shprehet i bindur që protesta do të ketë ndikim të ngjashëm siç patën ato në Prishtinë dhe në Hagë.
“Qëllimi i kësaj konference është protesta që po mbahet në kundërshtim të padrejtësive të luftës së lavdishme të krerëve të UÇK-së që po mbahen padrejtësisht në Hagë. Këtu jemi në këshill koordinues, por kemi kontakte edhe takime me të gjitha organizatat dhe qëllimi i mirë dhe i domosdoshëm është që bashkërisht të shfaqim shqetësimet dhe të bëjmë përpjekje ta synojmë atë që kanë pasur qëllim të parët tanë” , ka thënë Jashari.
Derisa kryetari i Shoqatës së të Burgosurve Politikë, Shefik Sadiku, ka kërkuar që Gjykata Speciale sa më shpejtë ta përfundoj misionin e saj.
“Një prej kërkesave kryesore është që kjo gjykatë të jetë transparente dhe sa më shpejt të kryejë misionin e saj. Kjo gjykatë do të duhej që të mbyllte misionin e vet dhe të mos sharronte në padrejtësi më të mëdha”, shprehet Sadiku.
Ndërsa kryetari i shoqërisë “Lëvizja”, Xhevat Bislimi e ka përshëndetur angazhimin e Shqipërisë për ta ngritur zërin për veteranët e Ushtrisë Çlirimtare të Kosovës
“Duke iu përgjigjur kërkesave tona Shqipëria po tregon mbështetje serioz”, thotë ai.
Kryeministri i Shqipërisë, Edi Rama, e ka mbështetur publikisht protestën që do të mbahet nesër në Tiranë, porse ka lënë të nënkuptohet që nuk do të marrë pjesë në të, për shkak siç tha Rama, se frikësohet nga mundësia e politizimit të saj.
