E mëngjesin e së mërkurës, ministri i Brendshëm ukrainas, Denys Monastyrskyi ishte në mesin e të paktën 18 viktimave nga rrëzimi i helikopterit në Kiev me të cilin ai po udhëtonte me kabinetin tij.
Në aksident humbën jetën edhe sekretari i shtetit Yurii Lubkovich, zëvendësministri i parë ukrainas Yevhen Yenin dhe tre fëmijë.
I pari i Ukrainës Volodymyr Zelenskyy përmes një postimi në rrjetin social “Telegram” ekipin e ndjerë të Ministrisë së Brendshme i quajti heronjë.
“Dhimbja është e papërshkrueshme. Unë kam udhëzuar Shërbimin e Sigurisë së Ukrainës për të zbuluar të gjitha rrethanat e asaj që ndodhi. Denys, Yevhen, Yuri, ekipi i Ministrisë së Punëve të Brendshme… patriotë të vërtetë të Ukrainës. U prehshi ne paqe! U prehshin në paqe të gjithë ata që vdiqën këtë mëngjes të zi”, tha ai.
Edhe kryeministri i Kosovës Albin Kurti shprehu ngushëllimet e tij për vdekjen e ministrit dhe civilëve ukrainas.
“I pikëlluar nga vdekja e Ministrit të Punëve të Brendshme Denys Monastyrsky dhe anëtarëve të kabinetit të tij. Shpreh ngushëllime të përzemërta për të dashurit e tyre dhe veçanërisht për familjet e fëmijëve të vrarë”,ka shkruar Kurti.
Ndërkohë nuk ka asnjë raportim zyrtar nëse rrëzimi i helikopterit ishte një aksident apo kishte lidhje me luftën.
Ministri i Brendshëm Denys Monastyrskyi, i cili ishte në krye të policisë së Ukrainës, është zyrtari më i lartë që ka vdekur që nga pushtimi i Rusisë gati 11 muaj më parë.
Vdekja e ministrit 42- vjeçar vjen në një periudhë veçanërisht të errët të luftës për Ukrainën, vetëm disa ditë pasi sulmi rus në ndërtesën e banimit në Ukrainën juglindore vrau 45 njerëz, duke përfshirë gjashtë fëmijë – sulmi më vdekjeprurës ndaj civilëve që nga pranvera./Tëvë1/.
