Një numër i madh qytetarësh në komunat veriore të Kosovës, veçanërisht në komunën e Zveçanit, kanë dalë për të votuar në zgjedhjet lokale që po zhvillohen sot.
Në një lidhje direkte për Televizionin Tëvë1, vëzhguesi i zgjedhjeve në katër komunat veriore, zoti Dushan Radakovic, raportoi se procesi po ecën në përgjithësi pa probleme, me përjashtim të disa vështirësive në Leposaviç.
“Në Zveçan ka pasur një numër të madh të njerëzve që kanë votuar, ku pjesëmarrja arrin deri në 40 deri 45%, në dallim nga zgjedhjet e 9 shkurtit,” tha Radakovic.
Ai theksoi se procesi në komunat veriore po zhvillohet në mënyrë të qetë, përveç një incidenti të vogël në një vendvotim në Leposaviç.
“Në Leposaviç, para rreth 30 minutash, disa persona u lënduan dhe u përfshi prokuroria dhe policia. Aktualisht situata është nën kontroll dhe institucionet po e menaxhojnë qetësisht,” raportoi Radakovic.
Ai përmendi gjithashtu një problem tjetër që ka ndikuar në procesin zgjedhor.
“Problemi më i madh është se rreth 100 persona kanë ndryshuar adresën e banimit, që ka krijuar disa vështirësi në procesin e votimit. Në Zubin Potok gjithashtu ka pasur një numër të madh të votuesve,” shtoi ai.
Radakovic theksoi se, përveç këtyre rasteve, zgjedhjet në komunat veriore po shkojnë në mënyrë të qetë dhe të organizuar.
