Mëngjesin e sotëm ka ndodhur një incident dhe aksident trafiku në magjistralen Prizren – Gjakovë.
Një kalimtar ka refuzuar që të ndalohet nga Policia e Kosovës gjatë kontrolleve rutinore.
Zëdhënësja e Policisë për Rajonin e Gjakovës, Vlera Krasniqi, konfirmon për teve1 se i dyshuari ka goditur automjetin zyrtar të Policisë, duke shkaktuar aksident trafiku ku është përfshirë edhe një automjet civil.
“Në orët e para të mëngjesit të sotëm, gjatë kontrolleve rutinë policore në fshatin Krushë, Rahovec, një drejtues automjeti ka refuzuar të ndalojë në pikën e kontrollit. Zyrtarët policorë janë vënë në ndjekje të tij dhe, me mbështetjen e njësive të tjera, kanë tentuar ta ndalojnë në rrugën magjistrale Prizren–Gjakovë, mirëpo ai ka refuzuar sërish të ndalojë dhe ka tentuar t’i godasë zyrtarët policorë. Gjatë përcjelljes nga një patrullë tjetër policore në rrugën “Gasper Karaqi” në Gjakovë, i dyshuari ka goditur automjetin zyrtar të Policisë, duke shkaktuar aksident trafiku ku është përfshirë edhe një automjet civil”, ka deklaruar zëdhënësja e Policisë për rajonin e Gjakovës, Vlera Krasniqi.
I njëjti person pas aksidentit ka tentuar që të largohet nga Policia në këmbë.
“Pas aksidentit, i dyshuari është përpjekur për tu larguar në këmbë, por është ndaluar dhe shoqëruar në stacionin policor. Në koordinim me prokurorin e shtetit, ndaj tij janë iniciuar rastet “Shkaktim i rrezikut të përgjithshëm” dhe “Sulm ndaj personit zyrtar”, ndërsa është ndaluar për 48 orë”, theksoi Krasniqi.
