Pesë vrasje brenda dy javësh alarmuan shoqërinë kosovare.
Kjo bëri që këtë të premte të organizohet një protestë në kryeqytet.
Vrasja e fundit e rreshterit policor, Muhamed Lika në Kaçanik, po vlerësohet si një alarm për shtetin.
“Sot jemi mbledhur, jo si individë të ndarë, por si një trup i vetëm për të ngritur zërin kundër plagës së thellë që po e gërryen shoqërinë tonë. Nuk ka më vend për heshtje. Kur një pjesëtar i Policisë së Kosovës bie viktimë e një akti të rëndë kriminal para hyrjes së ndërtesës, ku jeton, kjo nuk është thjesht një tragjedi personale. Ky është alarm për shtetin”, tha kryetari i Shoqatës “Roja e Kohës”, Shaip Murseli.
E njëri nga protestuesit u shpreh i zhgënjyer me menaxhimin që po bëhet nga institucionet e drejtësisë në këto raste.
“Ne kemi luftu dhe kemi ardh në këtë ditë që me pas një shtet ligjor me funksionu në mënyrë të barabartë e ai nuk është t’u funksionu, tu nis prej rendit të parë të policisë, prokurorisë, gjyqësisë dhe njerëzve të krimit, se këta janë nëntoka e krimit të Kosovës”, tha protestuesi Enever Haxholli.
Kësisoj, u bë thirrje që të parandalohen vrasjet.
“Kërkojmë që të unifikohet dhe të bashkohen ti formojnë organet shoqërore për ti kryer proceset të cilat po na presin”, tha përfaqësuesi i protestës, Isak Sfarça.
Me pankartat në duar ku u kërkua siguri për qytetarët, e gjithë protesta mbaroi në mënyrë paqësore.
