Zëvendësministri në detyrë i Drejtësisë, Vigan Qorrolli, ka thënë se dialogu strategjik me Shtetet e Bashkuara të Amerikës i pezulluar nuk kishte filluar së zbatuari asnjëherë.
Por, ai ka thënë se janë duke punuar që këtë dialog ta restaurojnë.
Qorrolli në emisionin “InfoNata” në Tëvë1 ka thënë se raportet bilaterale me Shtetet e Bashkuara të Amerikës janë shumë të rëndësishme dhe se po punojnë që siç ka thënë ai keqkuptimet momentale të tejkalohen.
“Siç e ka bërë të qartë kryeministri dialogu strategjik është proklamua si tillë, por nuk ka filluar së zbatuari asnjëherë, po ka pas një pezullim… Po synojmë që kjo gjë të restaurohet sa më shpejtë që mos të ketë një momentum tjetër që do ta vështirësonte komunikimin, nuk ka asnjë vështirësi komunikimi mes ShBA-së dhe Kosovës, besoj që raportet bilaterale janë shumë të rëndësishme. ShBA-të janë aleati jetik i Kosovës. Shpresojmë që këto çështje që mund të jenë keqkuptime të momentit të tejkalohen sa ma shpejtë dhe të kthehemi në binarë të duhur”, ka thënë Qorrolli.
Shtetet e Bashkuara të Amerikës kanë pezulluar dialogun strategjik me Kosovën javë më parë.
Në reagimin e parë pas këtij vendimi, Qeveria e Kosovës kishte thënë se ShBA është aleati kryesor i Kosovës dhe se kritikat do t’i marrin seriozisht.
ShBA në një reagim të ri kishte thënë se do të vazhdojë të mbështesë popullin e Kosovës, duke shtuar se janë të gatshëm të ecin përpara edhe me Qeverinë në detyrë, por siç kishin thënë duan një partner që “shmang veprimet destabilizuese”.
