Gjatë qershorit të këtij viti Qendra Klinike Universitare e Kosovës pati hapur tender për furnizim me perde.
Në këtë procedurë konkurruan gjithsej katër operatorë të përgjegjshëm.
Ndërsa dy javë më parë QKUK-ja nënshkroi kontratë më njërën nga kompanitë në vend, ku pritet të furnizohet me perde të llojeve të ndryshme në vlerë mbi 28 mijë euro.
Në një përgjigje elektronike këta të fundit thanë se një gjë e tillë erdhi pas ankesave për mungesë të perdeve adekuate.
“Në QKUK kemi pasur ankesa nga pacientët se në dhoma të klinikave dhe Reparteve ka mungesë të perdeve adekuate, andaj QKUK ka nisur përgatitjet shumë më herët, në mënyrë që sipas kërkesës së klinikave të furnizojmë me dy lloje perdeve, rrollne dhe shiritore, bazuar në kërkesa të klinikave! Varesisht prej kërkesave të klinikave është pregaditur paramasa dhe parallogaria per Kontratë. Janë dy lloje te perdeve, Rollne dhe Shiritore. Sipas Informatave që kemi një kontratë e ngjajshme ka qenë para dy vite”, kanë thënë për Tëvë 1 nga QKUK.
Mirëpo për veprime të tilla pati kritika.
Bekim Haxhiu, deputet i PDK-së dhe njëherit antar i komsionit për shëndetësi, thotë se në këtë sektor ka përcaktime jo të duhura të prioriteteve, derisa thekson edhe mungesën e barnave.
“Realisht ne kemi të bëjë me një keqmenaxhim në sektorin e shëndetësisë i cili po vazhdon me trende të rritura dhe me keqplanifikim dhe keqmenaxhim, si rezultat i kësaj është edhe percaktimi jo i duhur i prioriteteve në sektorin e shëndetësisë derisa kemi mungesë të barnave, pajisjeve mjekësore dhe furnizimeve tjera në sektorin e shëndetësisë, dikush aty brenda arrin të bëjë planfikime të natyrave të ndryshme të llojit të perdeve, jo që nuk janë të rëndësishme por sot prioritet është reduktimi i listave të pritjes”, thotë Haxhiu.
Ndërsa për mungesën e barnave në listën esenciale e cila është evidente tash e sa kohë, e komentuan edhe nga shoqata e pacientëve.
“Parimisht institucioni duhet me qenë i sigurt se po ofron shërbime shëndetësore për të gjithë qytetarët përfshirë edhe barnat në listen esenciale ato gjithmonë duhet të jenë në institucione shëndetësore, fakti që nuk sigurohen institucionet duhet të marrin përgjegjësi”, thotë Besim Kodra.
Ndërkaq sipas dosjes së tenderit operatori ekonomik duhet të furnizoj QKUK-në me perde të tipit shiritor me 800 m2; perde të llojit roll 900 m2; folie për dritare 300 m2; dhe perde ndarëse për shtrat dhe për pjesën e zhveshjes tek ultrazëri 300 m2.
