Zyra e Kryeministrit të Kosovës ka njoftuar se në mbledhje është marrë vendim që të ndahen mjetet financiare për huamarrje deri në 34 milionmë euro e 275 mijë euro për ndërmarrjet publike e që përfituese janë KOSTT-i dhe Telekomi i Kosovës.
“Në këtë mbledhje elektronike po ashtu janë miratuar në parim kërkesat e ndërmarrjeve publike për huamarrje deri në 34 milionë e 275 mijë euro (34,275,000.00 euro). Për KOSTT Sh.A. është aprovuar vlera e huamarrjes deri në 26 milionë e 500 mijë euro (26,500,000.00 euro) ndërkaq për Telekomin e Kosovës Sh.A., 7 milionë e 775 mijë euro (7,775,000.00 euro)”, thuhet ndër tjerash në njoftim.
Tutje, Qeveria ka miratuar vendimin për ndarjen 35 milionë eurove për masën e mbështetjes së qytetarëve prej 100 eurosh dhe 35 mijë euro për mbështetjen e Ministrisë së Mbrojtjes.
“Pas shqyrtimit të kërkesës së Ministrisë së Financave, Punës dhe Transfereve, është miratuar vendimi për ndarjen e mjeteve buxhetore për zbatimin e Pakos së Ringjalljes Ekonomike për masën 3.6 – Mbështetja e likuiditetit familjar dhe masën 4.4 – Mbështetja e sigurisë. Sipas vendimit janë ndarë 35 milionë euro (35,000,000,00 euro) për zbatimin e masave për shtimin e mbështetjes për qytetarët e Republikës së Kosovës dhe 35 mijë euro (35,000.00 euro) për mbështetjen e Ministrisë së Mbrojtjes në kuadër të masës për mbështetjen e sigurisë”, njofton ndër tjerash ekzekutivi.
Po ashtu, në mbledhje është emëruar edhe Hekuran Nikçi si Kryeinspektori i Inspektoratit të Punës me një mandat 4-vjeçar.
“Me vendimin e parë të miratuar në mbledhjen e sotme, me propozimin e Ministrisë së Financave, Punës dhe Transfereve, është emëruar Kryeinspektori i Inspektoratit të Punës në Republikën e Kosovës. Sipas vendimit, z. Hekuran Nikçi është emëruar në këtë pozitë për një mandat katër vjeçar. Kryeinspektori i emëruar sipas këtij vendimi do të kryejë detyrat dhe funksionet e përcaktuara me Ligjin për inspektoratin e punës”, thuhet në njoftim./teve1.info/
