Ministria për Punë, Familje dhe Vlerat e Luftës Çlirimtare është duke pritur raportin preliminar të inspektimit lidhur me trajtimin e rastit të 5-vjeçarit në Lipjan dhe fëmijëve të tjerë të kësaj familje.
Drejtori i departamentit për politika të shërbimeve sociale dhe familjare në këtë ministri, Blerim Shabani tha se me t’u njoftuar me rastin kanë ofruar pëlqimin për strehimin e fëmijëve dhe autorizuar inspektimin për trajtimin në këtë rast.
“Kemi ofruar pëlqimin për vendosjen e fëmijës gjegjësisht fëmijëve në strehim familjar në familjet që ofrojnë mbështetje. Dhe autorizim për njësinë inspektuese e cila në bazë të autorizimeve që i jep ligji ka fillur procesin e vlerësimit të rrethanave mbi përmbushjen e detyrimit sa i përket çështjes së menaxhimit të rastit në fjalë. Po presim raportin kronologjik dhe preliminar nga inspektimi lidhur me çështjen e trajtimit të rastit të fëmijëve”, tha ai në një konferencë për media.
Shabani tha së fëmijët e tjerë janë në vend të sigurt.
Ai ka thënë Qendrat për Përmirësimin Social janë kompetencë e komunave.
Ndërsa, 5-vjeçari që dyshohet se u keqtrajtua nga prindërit është operuar sot.
Sipas njoftimit të ShSKUK-së ai është në gjendje stabile .
Ndërsa, Prokuroria Themelore në Prishtinë ka njoftuar se prindërve të 5-vjeçarit u është caktuar masa e paraburgimit.
