Qeveria e Kosovës, është shprehur kategorikisht kundër idesë së shkëmbimit të territoreve. Ky reagim i ekzekutivit vjen pasi ish-këshilltari i sigurisë kombëtare amerikane, John Bolton, ka paralajmëruar se me ardhjen e Donald Trump në pushtet mund të rikthehet opsioni për shkëmbim të territoreve mes Kosovës dhe Serbisë.
Diplomati i njohur amerikan, John Bolton – i cili gjatë Presidencës së Parë të Donald Trump-it mbajti postin e Këshilltarit për Siguri Kombëtare deklaroi se ideja për shkëmbim territoresh mes Kosovës dhe Serbisë mund të rikthehet sërish meqë lideri Republikan i fitoi zgjedhjet presidenciale.
“Unë mendoj që gjatë mandatit të dytë të Donald Trump mund të rikthehet ideja për shkëmbimin e territoreve. Por, për këtë gjë kërkohet gatishmëri edhe nga Kosova e Serbia në mënyrë që të lëvizin përpara për një të ardhme më të mirë”, ka deklaruar ai.
Mirëpo nga qeveria e Kosovës thonë se një marrëveshje e tillë nuk është e pranueshme për ta, pasi sipas tyre, paraqet rrezik për konflikte të reja në Ballkan.
“Diskutimet rreth idesë së shkëmbimit të territoreve i patën dhënë një goditje të madhe integrimit të plotë e të qëndrueshëm të komunitetit joshumicë serb në komunat në veri të vendit. Në këto katër vjet, qeveria jonë është angazhuar në mënyrë të vazhdueshme dhe institucionale që të rikuperojmë këtë dëm dhe kemi arritur suksese të rëndësishme përmes shërbimeve të reja publike, rendit dhe ligjit, dhe infrastrukturës publike. Qeveria jonë ka pasur një qëndrim të parimor dhe të qartë kundërshtues ndaj idesë së shkëmbimit të territoreve, nuk përfshihet në diskutime që mund të rikthejnë një ide të tillë dhe e refuzon projekte e zgjidhje me karakter territorial. Përpjekja për ndarje të Kosovës nën petkun e shkëmbimit territorial nuk është projekt paqësor dhe ndez konflikt të gjerë e të gjatë në Ballkan”,ka thënë zëdhënësi i Qeverisë, Përparim Kryeziu.
Këtë ide e ka kundërshtuar ashpër edhe deputeti i Kuvendit të Kosovës nga radhët e Partisë Demokratike të Kosovës, Hisen Berisha.
Berisha thotë se presidenti Trump e shkarkoi nga detyra Boltonin pikërisht për këto arsye.
“Gabimi i parë është kthimi i mendimeve dhe ideve të z.Bolton i cili pikërisht për këto arsye u largua nga ekipi i Trump. Siç tha vet ai, idenë e ka dhënë ish-kryeministri i Mbretërisë së Bashkuar, Tony Blair, e pastaj Bolton ka biseduar edhe me Vuçiqin, por ideja ka ngelur aty” , ka deklaruar Berisha.
Sipas Berishës, nëse do të pranohej një marrëveshje e tillë atëherë do të ishte kthim mbrapa për Kosovën.
“Nëse kthehemi në këto tema nënkupton që Kosova do të humbas çdo arritje deri tek shpallja e pavarësisë së Kosovës”.
Ish-presidenti i Kosovës, Hashim Thaçi si dhe presidenti aktual i Serbisë, Aleksandar Vuçiq, patën folur për idenë e “korrigjimit të kufijve” mes dyja vendeve, por ata nuk prezantuan një plan konkret për publikun se si do të dukej kjo marrëveshje.
