Me forcë po largon mbeturinat nga qesja.
Por ky nuk është i vetmi qen endacak i cili këtë të martë po endej në oborrin e Qendrës Klinike Universitare të Kosovës.
Madje nga ta, një 15 vjeçare e pësoi rëndë gjatë kohës sa ishte në hapësirat e Klinikës Ortopedike.
Si pasojë e kafshimit nga ta, pësoi lëndime, për çka u detyrua të marrë ndihmë nga stafi mjekësor.
Për këtë rast kanë dhënë detaje edhe nga QKUK.
“Sot rreth orës 7:30, në Qendrën Emergjente të QKUK-së është paraqitur një rast, 15-vjeçare, me lëndime të shkaktuara nga qentë endacakë. Pacientja ka marrë trajtimin e nevojshëm mjekësor nga stafi emergjent dhe pas stabilizimit të gjendjes, është liruar për në shtëpi me udhëzimet përkatëse”, ka thënë Qyqalla.
Por të rrezikuar nga kjo gjendje po ndjehen studentët e mjekësisë, të cilët ndajnë të njëjtën hapësirë me Klinikat e QKUK-së.
“Me të thënë të drejtën është rrezik i madh, pasi përveç pacientëve, edhe studentët e stafi mjekësor janë të sulmuar vazhdimisht kur ka raste për javore ose për mujore kur dikush ose staf ose student ose edhe pacient sulmohet. Është e tmerrshme se është institucion shëndetësor ku njerëzit duhet me u ndje të sigurt, e jo me u tut ka po ecin dhe kah po shkojnë”, u shpreh një student.
Rasti i fundit i sulmit nga qentë endacakë brenda hapësirave të QKUK ishte raportuar një javë më parë.
Gjersa para një muaji, lëndime aty kishte pësuar edhe një mjeke, që ishte dhe shtatzënë.
