Avokati i Popullit, Naim Qelaj, thotë se Kosova për 23 vite ka arritur që të krijojë legjislacion të qëndrueshëm sa i përket respektimit të të drejtave të njeriut.
Qelaj, thotë se Kosova ka krijuar praktikë të mirë të respektimit të vlerave demokratike.
“Kosova për 23 vite ka arritur të krijoj legjislacion të qëndrueshëm që për një masë të madhe është i harmanizuar me legjislacionin e BE-së edhe me standardet më të avancuara ndërkombëtare sa i përket respektimit të të drejtave të njeriut. Kemi krijuar një praktikë të mirë të respektimit të vlerave demokratike që lidhen me respektimin e të drejtave të njeriut dhe në këto rrethana testi i Kosovës në nivelin e zbatimit dhe të respektimit të të drejtave të njeriut do të jetë në vendimin e Këshillit të Evropës për t’u pranuar Kosova si anëtare e barabartë në këtë organizatë”, tha ai në emisionin “InfoNata” në Tëvë1.
Avokati i Popullit tregon se brenda vitit paraqiten rreth 1 mijë e 500 ankesa individuale për shkelje të të drejtave të njeriut.
“Respektimi i të drejtave të njeriut nga perspektiva ime si Avokat i popullit vlerësohet mbi bazën e ankesave që i pranojmë dhe mbi bazën e raporteve që na i nxjerrim për ato ankesa, jo të ankesave individuale por edhe të ankesave që ne i marrim përmes informatave siç janë përmes mjeteve të informimit. Është një numër që sillet rreth 1 mijë e 500 raste në vit të ankesave individuale, dhe këto ankesa pastaj na tregojnë se ku janë defektet më të mëdha të zbatimit të ligjit dhe të funksionimit të sistemit sa i përket të drejtave të njeriut”, tha ai.
Qelaj thotë se kjo shifër nuk është e madhe, pasi që në vendet tjera ka edhe më shumë ankesa.
“Kjo shifër nuk është e madhe, në fakt në vende të tjera ka më shumë ankesa, por që kjo nuk tregon nivelin e saktë të respektimit të të drejtave të njeriut, sepse është në pyetje edhe vetëdijësimi edhe besueshmëria edhe shumë arsye të tjera që lidhen, edhe mungesa e informacionit në raste të caktuar. Jemi të krahasueshëm me vendet e rajonit, mendoj edhe me disa të vendeve evropiane që kanë një numër më të vogël të popullsisë”, shtoi ai./teve1.info/
