Tekniku nga Maqedonia e Veriut, Qatip Osmani edhe zyrtarisht është trajner i skuadrës së Malishevës.
Ekipi nga Superliga e Kosovës, të mërkurën e ka zyrtarizuar Osmanin, që do të jetë pjesë e Malishevës për sezonin 2025/26.
Në postin e trajnerit, Osmani ka zëvendësuar Bekim Isufin e larguar javë më parë pas debaklit në kualifikimet e Ligës së Evropës.
Malisheva u eliminua në raundin e parë kualfikues të kësaj gare nga Breidabliku me rezultatin e përgjithshëm 8:0.
Për Osmanin, kjo është hera e parë që punon në Kosovë pas Maqedonisë së Veriut dhe Shqipërisë.
Osmani ka drejtuar Shkëndijën, Renovën, Shkupin e Vllazninë e Shkodrës kurse në Maqedoninë e Veriut ka fituar tri herë titullin e kampionit.
