Deputeti i Partisë Demokratike të Kosovës, Rashit Qalaj ka kritikuar ministrin e Brendshëm, Xhelal Sveçla për mënyrën se si ai udhëheq këtë dikaster.
Qalaj thotë se në kohën kur ishte drejtor i Policisë, kanë informuar në mundësinë e parë ministrin e Brendshëm, pasi siç thotë ai, është obligim.
Por, sipas tij, të dalë ministri Sveçla e të japë detaje për ndonjë operacion para se ai të fillojë, “është më shumë se vepër penale”.
“Mirëpo të qes status ministri i Brendshëm para konferencës për shtyp të hetuesve dhe të prokurorit për konfiskimin e provave, për informacione të ndryshme për luftimin e trafikimit, të del ministri e të thotë filan ish-polici u akuzua për terrorizëm, a ende s’kemi pasë asnjë qëndrim të Prokurorisë së shtetit apo të hetutesisë së Policisë, të del ministri të thotë nesër Policia ka me zhvillu një operacion kundër drogës, nëse ju kujtohet në fillimin e mandatit, kjo është më shumë se vepër penale. Dhe unë mendoj që me të vërtetë është dashur të nesërmen ministri i Brendshëm të ftohet nga Prokuroria apo t’i shkojë prokurori në zyrë dhe ta intervistojë”, deklaroi ai në “Këndi i Debatit” në Tëvë 1.
